15 jul 2011

UNA FOTO DE ROBERTO PATO

                                
                                      Pincha na foto pa vela un poco más grande.


Titula esta foto Roberto: "Donde solíamos gritar", y al pie diz: "Aquí descubrí el cine. Gran Teatro Maxi, el cine de Pola de Laviana. Está muerto desde hace años. Una pena".
Quitando dalguna obra esporádica tuvo dedicáu más que nada a la proyección de películes, anque se llamare "teatro". Pue dicise que yera la caxa los sueños de Llaviana, sueños que salíen del arte cinematográficu, el más vivu de tola mitá última del s.XX, na que munchos nacimos y vivimos.
Como se pue ver namás que saca una parte, un cachu de la fachada na qu´asomen les primeres teyes de la cubierta. Ye como un cuadru sacáu del espresionismo abstracto, onde apaez la primera pallabra que da nome al edificiu GRAN y que, visto cómo ta l´otro, espresa con muncha fuerza esi contraste. Un cuadru fechu cola técnica de raspao, onde se pue ver dende´l primer revoque gris a les sucesives capes d´amariellos y coloraos teya, toos ellos sin vida. La foto tien poca lluz, acentuando esa frialdá y esi abandonu.
Vese un arcu de mediupuntu y parte d´otru que nos recuerda a eses construcciones del modernismo de principios del venti, qu´utilizaba formes sencilles neorrenacentistes, qu´imitaba o trataba d´imitar los grandes teatros de ciudaes europees (tamién ye otru contraste, si se tien en cuenta que la Pola tien y tenía poco más de 5.000 habitantes). Sólo como adornu, yá que son ventanes ciegues y nuna repisa d´enrriba dos palombos, que la tienen entera cagada. Ún ta como durmiendo, como si tuviere en so casa y l´otru picotia con poca gana quién sabe qué. Palombos que son símbolos de les ciudaes y parásitos d´eses ciudaes.
Diz esta foto esto y munches más coses que se pueden intuir. Quiciás esa lluz pudiera ser d´iviernu, una lluz fría nun edificiu n´onde ardíen los sueños y se gritaba y n´onde nun queden más que sombres, silencios y cenices que paez que tan mezclaes colos colores de la fachada.
Paso con frecuencia delantre d´esti cine, pero ye lo que diz Roberto, tamos FARTUCOS DE MIRAR SIN VER

2 comentarios:

  1. Guapa semeya.
    Y falando de Cines/Teatros y ciudaes,nel mio pueblu ta tovía en pie'l Cine, que dicen que nel so momentu, el proyector Phillips que tenía (y tien) namás lu había ellí y n'Uviéu.
    Cuando trancaron esi Cine/Teatru, tuvieron qu'empezar a dir al Cine de la parroquia d'al llau.
    Nun ye d'estrañar que 5.000 habitantes fuere una cifra merecedora d'un bon Cine.

    ResponderEliminar
  2. Habría que restauralos toos, anque fuere pa otra cosa. Un saludu, Rubén.

    ResponderEliminar