17 oct 2016

DESORDENAR CONCIENCIES

Alfonso y yo. (Semeya de lne).
Les coses nunca son lo que paecen ser, sobre too si vienen diches dende los medios de formación. 
Esti principiu debería tar siempre presente y en primer llugar pa cualquier persona que se quiera dedicar a la enseñanza. Habríemos d´aprender de los paisanos y paisanes de pueblu -de lo poco que nos quede de pueblu- a desconfiar, cuando nos enyerben con estadístiques, cuando nos dan los precisos presupuestos del estáu o, quesió, cuando nos confirmen la definición exacta de la poesía. Siempre hai trampa y la función del educador tien que ser desordenalo too, desordenar conciencies; anque quién soi yo pa sentar principios, podrá pensar quien llea esto, con tola razón. Al final lo único que cuenta son los fechos.
Alfonso López Alfonso fue alumnu míu allá pelos años ochenta -ún de los meyores, sabémoslo tolos que lu tratemos-, ye un gran escritor y una persona culta y con too y a pesar de too ye un buen amigu.
Escribió esti veranu na Revista La Maniega del suroccidente asturianu un artículu sobre les maestres y maestros. Ye una descrición de persones qu´a mi me llega a lo más fondo. Como buen escritor que ye, sabe tocar onde más duel.
Gracies, queríu Alfonso, paezme un poco desaxerao, pero tú sabrás.
(Póngovos aquí l´artículu en cuestión).

9 mar 2016

LA DESOBEDIENCIA DEL CAPITÁN DICKSON

Una de les primeres pallabres qu´apriende a dicir cualquier nenu o nena ye "non" y cuento que ye una de les más importantes pal restu de la nuestra vida. Atrévome a dicir que quiciás pue ser la pallabra más importante de la Hestoria de la Humanidá con mayúscules. Polo menos ye la más importante d´esta hestoria que voi contar y que tien por méritos propios un llugar privilexáu na Hestoria Universal de la Insumisión o de la Desobediencia.
Archibald Dickson.
El día 28 de marzu de 1939 el capitán galés Archibald Dickson vía dende la borda del so antiguu buque carboneru, el Stanbrook, a miles de persones esperando nel puertu d´Alicante pa ser evacuaes. Anque había xente bien vistida, paeció-y que la mayoría yera mui probe, estremadamente probe, que llevaben nuna maleta o en bolses lo poco que teníen. Munchos diben con ropa vieyo de cualquier manera y teníen un aspectu mui desamparáu, como de pasar muncha fame. 
El capitán Dickson taba allí trabayando pa la naviera France Navigation, esperando pa cargar azafrán y naranxes y tenía la orde del dueñu del cargueru, Jack Billmeir, de nun evacuar a nengún civil en barcu. Amás d´otres coses, yera mui peligroso porque taba arrodiáu pola Armada franquista, los submarinos de Mussolini y la aviación nazi.
De toes maneres, nun lo pensó dos veces: ¡a la mierda les naranxes y l´azafrán! ¡Los submarinos y los aviones!
- Lo primero ye lo primero. -Fue lo que quiciás pensó-.
Al atapecer, cargó nel vieyu buque a tola xente que pudo -esactamente 2.638 persones-, ente elles una neña llamada Helia González qu´años más tarde diba recordar en un llibru l´abrazu fuerte d´aquel paisanu al subir al barcu y el poco café que-yos pudo dar pa beber a toa a quella xente y dalgún bocáu que pudieron meter en cuerpu.
Per otru llau, yera peligroso tamién porque con tantu pesu aquel barcu que nun taba pa munchos trotes podía naufragar, por eso precísamente tuvo que dir escoráu camín d´Orán pembaxo la llinia de flotación; tamién porque, anque yera nueche tapio, tuvo que salir pente los bombardeos del Canarias, el barcu franquista que fixo aquel día del puertu d´Alicante una ratonera pa los refuxaos republicanos. Pero fue neciu´l paisanu, dicho nel meyor de los sentíos, neciu y testerón. Y tovía lo fue más, porque´l al llegar a les costes africanes colos evacuaos depués d´un día enteru navegando naquelles condiciones, el gobiernu colonial francés d´Orán negábase a que´l barcu atracare nel puertu de Mazalquivir. Fue entós cuando´l capitán Dickson amenazó con estrellar contra´l muelle´l barcu, si nun lu dexaben atracar. Y al final atracó.
¡Ai Europa, la vieya Europa! ¡La Europa de tantes miseries!, pero onde siempre paez que se va a atopar xente que sabe dicir "non" como aquel capitán Dickson, o como esi otru paisanu tamién de p´aquella parte, Raimon, que dicía: "¡Non! ¡Yo digo non! Nosotros nun somos d´esi mundu".

27 ene 2016

PEÑA MEA Y UN POETA

Canzana y Peña Mea. (Semeya de Rosana Díaz, fía de Valentín el xastre.)
Si tercia, préstame subir tolos años una vez siquiera, a Peña Mea, normalmente per Doñango y la Boyica, beber na fuente´l Gatu, l´agua que sal a 1500 metros, baxar pel Arcón, per Pel.l.uno. Nun sé por qué, pero siempre ye como si fuere la primer vez. Peña Mea ye mítica y pa los que somos de Llaviana ye La Peña con mayúscules, anque haya otres bien guapes tamién.
Quiero recordar nesti momentu un día de primeros d´ochobre de 1977 n´Uviéu. Estrenábame como alumnu de primero de Filoloxía y subía andando dende la plaza Feijoo pela calle San Vicente. Crucéme na esquina que da pa la Corrada del Obispo, enfrente d´un edificiu medio en ruines (la llamada casa del deán Payarinos, agora Conservatoriu de música) con un conocíu de Llaviana, compañeru de xuegu d´axedrez que taba preparando la tesis doctoral sobre un tema de Lliteratura Inglesa, Vicente. Venía precísamente col que-y la dirixía, un paisanu qu´a mi me paeció mui vieyín daquella con un aspectu xeneral mui agradable, yera José Benito Álvarez Builla.
Presentóme Vicente como vecín de Llaviana y aquel paisanu empezó a falame de Peña Mea y a preguntame pola tierra de la que yo venía a Uviéu, pero como si supiere más que yo mesmu d´ella. Pue dicise que vi´l mio pueblu y a Peña Mea como nunca la viera antes. 
Fue la única ocasión na que falé col poeta, anque supi por compañeros de Facultá que yera un buen paisanu.
Supi más tarde tamién que dalgún de los sos poemes yeren cantaos por Nuberu. ¡Cuántes veces canté solu y emocionáu camín d´Estremadura al final de los ochenta aquel Como tu yes, que nin siquiera tovía sabía que yera una adaptación del poema de José Benito Álvarez Builla, el so "Himnu a la xuventú d´Asturies"!
Estos díes enteréme qu´acaben de publicar unos poemes suyos, Rimas desde la celda y préstame recordar nesti cuadernu - yá yera hora- a aquel poeta y aquellos otros versos. Recordar el día que crucé unes pallabres con aquel paisanu que tanto sabía de la mio tierra y que me fixo ver Peña Mea como antes nunca la viera. Creo que la buena poesía ye precísamente la que nos fai ver como somos.


COMO TU YES

Yá ta tapeciendo Asturies
pol mio corazón adientro
fainme yá sombra les penes
pero yo yá nun t'alcuentro,


Quise ser como tu yes,
borrina llume y formientu,
ser pequeñu col humilde,
grandón  col altaneru,
apacible col benditu
col babayu pendencieru,
xenerosu col amigu
col tiranu guerreru.
Y agora que toa t'empines
llamando a conceyu abiertu
agora, Asturies del suañu
nin t'alcuentro nin m' alcuentro.
Por eso vengo a decivos
coles vidayes ferviendo
dir alcontrala vosotros
que yo yá nun tengo tiempu,
dir alcontrala vosotros
que yo yá la tengo dientro.
Música: Sergio Domingo
Lletra: José Benito Alvarez Builla
Adaptación del poema: "Himnu a la xuventú d' Asturies", Uviéu, 1978