25 sept 2012

XABALÍN (Diariu d´un agricultor)

Cola seca d´esti veranu la tierra ta duro y los xabalinos tiénenlo feo pa fozar, asina qu´anden mayormente peles poques llamargues que topen, anque tamién s´acerquen a les cuadres del pueblu a buscar merucos ente´l cuchu.
Esti sábadu espardióme ún tola parva que tengo apilada na parte atrás de la cuadra y cola cuenta que nun ta´l ganáu y dexo abierta la puerta que da pal prau pa ventilar, entró dientro y encamó nún de los peselbes de les vaques. Allí taba la güelga fecha ente la yerba pela mañana.
Yá me lo dicía va tiempu Lauriano un vecín que ye cazador, que nun va facer falta nin matalos. "Van dir ellos solos pa la pota, Miguel".
Anduvi mirando´l cierre y faltóme tiempu pa saber per qué parte del prau entró. Había pelos y barro nuna llata baxa y un furacu nel alambre oveyero. Dexélo como taba y pensé prepara-y una corbata, pero paecióme que yera meyor esperalu de nueche de la que ta tan a gustu dientro la cuadra y tranca-y la puerta per fuera. Llueu fueu col ventidós o, quiciás meyor, anestesia xeneral cola cota l´hachu en medio la tiesta antes de coralu, yá ta, como se suel dicir, chorizos pa una temporada.

2 comentarios:

  1. Hola Miguel:

    Como-y eche una güeya'l SEPRONA a esti blog van aplicate'l novenu mandamientu y vas tener qu'esplicate nel cuartelillo.
    De toes maneres, bona suerte nel intentu y que'l orbayu t'acompañe (que bona falta fae).

    Un amigu

    ResponderEliminar
    Respuestas
    1. Gracies, amigu anónimu y qu´asina seya lo del orbayu pa toos.
      Un abrazu.

      Eliminar