28 jun. 2010

YONI Y YO Y YO MESMU

EL POETA QUE NUN VIENO NEL MAYFLOWER
Anque maldita falta-y faga a Pablo que yo nin naide fale del so llibru qu´anda estos díes per ende (falar d´un llibru ye namás DEclarar lo que ta claro), la cosa ye que m´apetez dicir daqué d´él por esi rixu que nos pruye a toos cuando un escritor nos presta.
Yá cuando sacó l´escelente poemariu Asturiana beat nos alvertía dende la primera páxina a los sos llectores, que nun llegaba a eses costes nel Mayflower. Creo que fue nel so momentu (y acasu sigue siendo) un buen xingón pa la poesía que se taba y se ta faciendo.
Yoni y yo empieza na portada (buena portada) a danos les pistes de lo que se cuez dientro. La buena lliteratura fala siempre de la hestoria que nun cuenta la Hestoria con mayúscules. Quien quiera conocer agora o nun futuru la realidá del momentu que vivimos, tendrá que dir a llibros como esti de Pablo. Pero que naide crea que somos los otros (los que nun somos Yoni, un macarra de barriada, un personaxe de cómic), distintos. Yoni somos toos, los sos mieos, les sos preocupaciones nun son n´esencia otres que les de la mayoría de la xente, por nun dicir de tola xente. Esprésanoslo dende Ficha hasta La keta y Yurena la pink. Tamién somos el neñu de Del chicle al cristal. Yo somos toos y lo mesmo. Los mesmos.



No hay comentarios:

Publicar un comentario