(21 de febreru de 1893)
Cuando una persona desarrolla rasgos dramáticos (normalmente cómicos) nel so comportamientu social, conviértese nun personaxe. Na época que yo me crié na Pola de Llaviana había unos cuantos (homes o muyeres) y, anque dalgún queda tovía, cada vez hai menos. Tamién queda dalgún tovía per Uviéu. Suelen ser tema de tertulies y dellos puen acabar en leyenda. Esti ye´l casu, salvando les distancies, de Roy Bean, "el xuez de la forca", que ye´l que gasta barba blanca na semeya.
Pa los que nos criamos col cine, los cuentos y hestories viénennos munches veces d´esti arte y ye sabío que les de vaqueros llenaron una parte mui importante de les pantalles.
El que tamos viendo na foto ye´l verdaderu Roy Bean que vivió en Texas hasta principios del s.XX. Detrás ta el "salón" qu´él llamaba´l Jersey Lilly, n´honor a l´actriz Lillie Langtry, el so amor platónicu. Había dos carteles naquel llugar, ún fuera que ponía, anque nun s´aprecia bien (ICE COLD BEER & LAW THE WEST OF PECOS/ "Cerveza xelao y la Llei al oeste del Pecos") y otru dientro con una foto de l´actriz.
Como toes estes hestories de perxonaxes nun sabemos bien ónde empieza la realidá y ónde acaba la ficción. Cuenten d´él que yera un lladrón de bancos na so mocedá y que nuna d´aquelles, otros como él robáron-y tolo que tenía, colgáronlu d´un arbol y abandonáronlu. El casu fue que la caña esguayó y nun morrió, asina que fue pela nueche a onde taben durmiendo los que lu colgaron y nun quedó nin l´apuntador, matólos a toos. Restolando pela casa onde taben, alcontró un Llibru coles Leyes de Texas y dicen qu´al lleélu sufrió una especie de tresformación mística, colo que´l restu de la so vida dedicóse a facer cumplir la Llei. Cuenten qu´aforcó a más de 60 criminales. Ún de los rasgos más característicos d´esti xuez, yera la so manera de tratar les sentencies. Afanábase por facer poesía nos sos xuicios. Una mui nomada fue la del bandoleru Víctor Menéndez, sarcástica dafechu y que podemos traducir asina:
"La seronda anúnciase pela llanura
de Texas, dexando ensin fueyes les rames
de los árboles. Arderá con llocura
la tarde. Va ser amburada en mil llames.
Volverá l´iviernu coles nueches llargues
y xelaes. Vendrá la nieve primera,
reposu blancu de xornaes amargues.
Y otra vuelta, tornará la primavera.
Con ella los páxaros han de volver
del sur y los árboles florecerán
pintando los valles nesti xorrecer
y los pastos pelos montes nacerán.
Pero usté nun podrá ver yá nada d´eso
colos güeyos, porque ha de ser condenáu.
Agora dirá empobináu ex profeso
a un roble cercanu y tien de ser colgáu.
La infantilidá de Roy Bean llegaba a estremos insospechaos. Dicen tamién qu´una vez colgó a un borrachu namás porque taba disparando contra´l retratu del so amor "Jersey Lilly", a la que tenía nun pedestal, pero que nunca llegó a conocela personalmente. El xuez mandába-y cartes d´amor a les qu´ella llegó a responder. Inclusive plantóse a velu cuando la leyenda del xuez fue creciendo, pero llegó diez meses más tarde de la muerte de Roy Bean en 1902.
No hay comentarios:
Publicar un comentario