20N

L´otru día n´AGROSIERO, na cafetería del mercáu había un cartel con esta foto que dicía dalgo asina como "Joderos, conmigo podíais fumar". Dalgún ganaderu fixo bromes tamién col 20N y acordéme.

A les tantes de la madrugada, Manolo Orviz y José Miguel prendieron toles lluces del dormitoriu C.

- Morrió Franco.

Tábemos na parte más alta de la Residencia Santa Bárbara nún de los dormitorios corríos qu´había entós nel Orfanato Mineru d´Uviéu y, sobre too, José Miguel, pasaba les nueches cola radio pegada a la oreya nos servicios comunes que taben al fondu.

- Yera hora, dixo Solís, de tener unos díes sin clase. Depués de la noticia nun volvimos dormir más, hasta que nos llevantemos.

Entós yo estudiaba nel Alfonso II (“el masculino”) y había una profesora que nun podía ver al dictador (llueu apaecieron más) porque cuando fusilaron a Lorca dixo: "Ah! el poeta de los gitanos", y siguió comiendo. Yera “La Angelita”, una profesora piquiñina, pero enorme. Un día refiriéndose a mi, nun m´acuerdo bien a cuentu de qué, dixo pa la clase que nun s´estrañare naide si un día víamos nuna llibrería dalgún llibru míu. Díxolo de mi y de más xente (quedábamos plasmaos).Creo que nun la entendí bien entós, pero gustaríame poder agradece-y aquelles pallabres. Agora yá nun pue ser.

Los años pasaron como pasen los díes y los que siguieron fixéronnos sentir l´amenaza del fascismu vivu como aliendu na nuca y quiciás esi mieu fue´l que fixo pesar más la pallabra “reforma” que la pallabra “ruptura”, el que fai que tovía muncha xente vea a dalgunos políticos nes valles publicitaries cola camisa azul de la OJE. Fue´l que fixo que nun se pudiere xulgar el franquismu y nun toi falando de la guerra nin d´años mui p´atrás d´aquel 75. Fue´l que nos fixo olvidar que viviéramos, unos más tiempu y otros menos, nún de los países d´Europa más atrasaos por cuenta de la fusión de la relixón y l´Estáu. L´únicu país, que se sepa, qu´inhabilitó a un xuez, por tratar de facer xusticia, que nun xulgó a nin ún solu -nin ún solu- asesinu o torturador fascista.

Cambiaron muncho les coses, nun digo que non, pero depués de toos estos años, tantos años yá, salten delles veces toles bisagres d´eso que llamamos democracia y que recientemente y sin saber cómo, la xente del pueblu vieno a recordanos que nun ye real tovía.

Lo peor del autoritarismu y de les actitúes autoritaries ye que queden impunes.

- ¿Morrió Franco o namás tuvimos unos díes sin clase?

CENTRU CULTURAL LA SEMIENTE

En L´Entregu (y con eso ta too dicho) grabóse esti vídiu el 6/05/11 del que yá vos falé en MASTERS OF THE POETRY. Esti fenómeno que ye Alfredo Huergo ye´l que graba estes timbes poétiques.

Por si queréis ver onde recito unes pallabres de payasu, si tenéis paciencia. Ver VÍDIU

GAMONEDA

Esti viernes 16 de setiembre vien a la Casa de la Buelga (Ciañu) Antonio Gamoneda, nun actu organizáu por Cauce Nalón.
Poeta asociáu a la xeneración de los 50, el "descubrimientu" por parte de los llectores d´esti gran autor fue tardíu por munches razones, anque´l reconocimientu públicu del Premiu Cervantes punxo les coses nel sitiu, teniendo en cuenta que tamos ante ún de los meyores poetes vivos de la llingua castellana. Ye yá la 5ª vez que vien a La Cuenca pola so amistá con esta Asociación. Dende´l mio puntu de vista, la diferencia sustancial ente ún qu´escribe versos y un gran poeta como esti, ye que nun dexa indiferente a naide. En directo tien una voz profunda qu´impresiona, pero sobremanera lo que diz. Déxovos aquí ún de los poemes que más m´impresionó y me sigue impresionando d´esti autor, a ver qué vos paez:

Malos recuerdos

                                   La vergüenza es un sentimiento revolucionario
                                                                            KARL MARX

Llevo colgados de mi corazón
los ojos de una perra y, más abajo,
una carta de madre campesina.

Cuando yo tenía doce años,
algunos días, al anochecer,
llevábamos al sótano a una perra
sucia y pequeña.

Con un cable le dábamos y luego
con las astillas y los hierros. (Era
así. Era así.
                 Ella gemía,
se arrastraba pidiendo, se orinaba,
y nosotros la colgábamos para pegar mejor).

Aquella perra iba con nosotros
a las praderas y los cuestos. Era
veloz y nos amaba.


Cuando yo tenía quince años,
un día, no sé cómo, llegó a mí
un sobre con la carta de un soldado.

Le escribía su madre. No recuerdo:
«¿Cuándo vienes? Tu hermana no me habla.
No te puedo mandar ningún dinero...»

Y, en el sobre, doblados, cinco sellos
y papel de fumar para su hijo.
«Tu madre que te quiere.»
                                       No recuerdo
el nombre de la madre del soldado.

Aquella carta no llegó a su destino:
yo robé al soldado su papel de fumar
y rompí las palabras que decían
el nombre de su madre.

Mi vergüenza es tan grande como mi cuerpo,
pero aunque tuviese el tamaño de la tierra
no podría volver y despegar
el cable de aquel vientre ni enviar
la carta del soldado.


Antonio Gamoneda, Blues castellano, Gijón, Noega, 1982

PRÉVERT EN BERCK SUR MER

Ye una villa costera de veranéu. París cerca y Amiens a tiru piedra. Ye día de mercáu como los que se faen nes villes asturianes per aquí, tenderetes per tolos llaos, mercachifles que vienden coses increíbles, ropa barato, verdura, pitos de casa, quesos de casa y... nunes botelles de plástico de a llitru un paisanu viende lleche, diz que recién catao.

Pienso en toles coses que nos dixeron al entrar na Comunidá Europea, que nun se pue vender lleche como antes, que tien que pasar per Sanidá, que ye de países del tercer mundu, que si uno, que si otro, que qué sé yo... Pienso en mio pá que va munchos años, nos años del "atrasu" tamién vendía la lleche a los vecinos asina, pienso no sano que taba´l ganáu daquella, pienso nes vaques lloques de depués, pienso nes llingües azules, pienso nos piensos (fechos con güesos d´animales) y mérco-y un quesu al paisanu (très, très bon fromage, monsieur. Merci.) Nótase-y un poco l´acentu del chtimi (restos del Picardo colos que los franceses faen bromes y burlles de los paisanos d´esa zona).

Sigo andando ente la xente y nuna esquina del mercáu esti poema de Prévert pintáu con tiza neso que paez una mampara y una puerta:

Inmensu y coloráu

Inmensu y coloráu

penriba del Grand Palais

el sol d´iviernu apaecía

y desapaecía.

Como él, el mio corazón va desapaecer

y tola mio sangre va dise,

dise a la to busca.

El mio amor,

la mio guapura

y topate

allí onde tú tas.                       Jacques Prévert.

RUTGER KOPLAND

Rutger Kopland nació en Goor (1934) y ye catedráticu eméritu de neurosiquiatría de la Universidá de Groningen. Ensayista y siquiatra, conózselu sobre too como poeta nos Países Baxos. Pa mi un gran descubrimientu. Ahí van dos poemes.

EL DIOS NEL MIO CEREBRU (DE GOD IN MIJN HERSENEN)

Cuando cuasi taba espiertu recordé
qu´esa nueche viviera nel pasáu
y sin el menor plasmu volví
a creer que Dios esistía

quería por fin falar con él
dixéronme: ye un home mui atentu
pues llamalu per teléfonu

llamé y escuché una voz, una voz mui dulce
asina qu´imaxiné una dulce muyer alada
como les que se ven nes tarxetes de felicitación

si quier falar con dios, dixo, calque uno
si nun quier nun calque
calqué uno

y la mesma muyer alada dixo: tovía hai
una persona a la espera y esa persona ye usted

recordé que tuvi que cavilar sobre esto
infinitamente hasta qu´esperté y Dios volvió
a desapaecer, per ahí nel mio cerebru



LA QUÍMICA DEL ALMA (DE CHEMIE VAN DE ZIEL)

Los sabios más antiguos pensaben yá

que tamos ocupaos pol alma

dalguna parte´l nuestru cuerpu debía ser

lo que yera y al mesmu tiempu ser

otra cosa inimaxinablemente diferente

la ciencia pura y dura demostró agora

qu´esi ye´l casu efectivamente

miróse coles máquines más guapes

el momentu y el llugar nel que les nuestres molécules se tresformen

en dalguna cosa tan volátil

como un recuerdu feliz

y el momentu y el llugar nel qu´esi recuerdu

desapaez nes molécules

nel mesmu momentu y nel mesmu llugar

y sí: les pantalles queden vacíes

y les impresores queden en silenciu –

ye la prueba más convincente.

EL PUENTE/HET BRUG

Nací a escasos cien metros d´esti puente  (El Puente d´Arcu) al que por aquí en Llaviana-y llamamos El Puente normalmente.

Het nederlands is wonderzoet. El neerlandés ye maraviyoso.
La ciudá de Brugge (que se tradució al castellanu como Brujas) quier dicir nesa llingua neerlandesa precisamente Puentes. Ta situada na zona flamenca de Bélxica y nin qué dicir tien que ye guapa como poques.               

 Quedémonos nesta casa antigua rehabilitada como hotel en plenu centru de la ciudá, que llevaba una familia con gran arguyu de la so llingua. Hai per tolos llaos carteles, como estos que pongo aquí, en castellanu y en portugués.

Flandes siempre tuvo dominada históricamente (España, Austria, Francia) y reproducióse con frecuencia na so llingua esi despreciu por ser sur, al nun ser tan valorada como la otra variante del norte, l´holandés (aquí tamién hai norte y sur) o´l francés o l´alemán. De toes maneres ye xente bien afayadizo y agora paez ser que les coses son d´otra manera.

La ciudá de los puentes ta enllena d´ellos y cruzada por canales, too ello conservao como nos tiempos más antiguos. Pagó la pena conocela y comer nesa otra casa que ta al llau d´esti hotel onde ponen buena comida de tradición flamenca con buena relación calidá-preciu.

Tanto nes ciudaes como nos pueblos más pequeños conserven la so arquitectura, la piedra, etc. con munchu detalle. Detalles que tienen pa toles coses y que delles veces paezme que se pasen un poco. Dígolo, porque nun pueblu sentámonos a tomar un café nuna terraza de la plaza normal, con xente del pueblu y precios normales y sirviéronmelu d´esta manera. Depués fui dándome cuenta que pa ellos estes caxigalines son corrientes. Por exemplu nun camping, si te dicen que´l coche tien que tar a la derecha y la tienda a la izquierda, paez-yos mui mal si lo faes al revés, gústa-yos too al milímetro, anque seya´l mesmu espaciu.

D´eses tierres traigo una antoloxía de los últimos poetes neerlandeses. Polo que pudi ver nuna güeyada rápida que-y eché, trátase d´una poesía con buen sentíu del humor y con una fina ironía que los caracteriza, según dicen, nun sentíu xeneral. Ver veremos.

Cuando reflexono sobre la  poesía asturiana d´estos últimos trentaitantos años doime cuenta que ye una poesía mui triste en xeneral. A dalgunos poetes a los que-yos lo comenté en dalguna ocasión nun-yos paez mui bien, pero creo que ye asina y dame qué pensar.

TOOS SOMOS ÚN Y EL MESMU

La cita presocrática vien al casu porque tuvi trancada, bloquiada, la cuenta del Facebook unos díes. Paez ser -yo nun lo sabía- que´l FB detecta´l sitiu nel que t´alcuentres, que si nun ye´l de la to tierra, el to país, lo que fai ye bloquiar la cuenta, por si nun yes tu´l qu´entres, por si ye otru que ta suplantando la to personalidá.

La cosa fue qu´un día llegóme una notificación al corréu (el dixital) de que Pablo X Suárez lleera un testu míu nuna Timba Poética a la que Sergio S. Taboada m´invitara y a la que nun podía asistir porque taba precisamente fuera, n´otru país, y al tratar d´entrar nel FB, que si quies, que nun podía ser porque yo podía ser otru. Proponíame l´ordenador una encuesta en neerlandés si quería entrar, pa saber si yera´l mesmu yo´l qu´entraba dende esta casina nel 19 de la Rijkstraatweg de Niewerluis n´Holanda y el qu´entraba otres veces dende Canzana en Llaviana, o n´Uviéu o quiciás si yera´l mesmu que Pablo citaba na Timba d´Avilés. En fin, ¿cómo esplica-y a un ordenador que toos somos ún y el mesmu como yá dicíen Parménides o Heráclito va tiempu? ¿Distingurá´l FB les nacionalidaes hestóriques o sólo les alministratives?¿Cómo esplica-y que tolos que soi y que fui son el mesmu?

Conocí hai unos años a un conductor de tranvía que facía tolos díes la llinia Irún-Hendaia. Nes paraes que tien que facer cuando nun sitiu cuando n´otru supongo que mirará dalguna vez el FB. ¿Bloquiará-ylu en Irún o en Hendaia?¿Fará-y una encuesta si quier entrar? ¿En qué idioma, francés, castellanu, o quiciás n´Eusquera?